कृषि आधुनिकीकरण दोस्रो चरणका लागि एक खर्ब ४० अर्बको परियोजना

राष्ट्रिय कृषि आधुनिकीकरण कार्यक्रमको दोस्रो चरण चलाउन करिब १ खर्ब ४० अर्ब रुपैयाँको परियोजना तयार भएको छ। यो परियोजना आगामी आर्थिक वर्षदेखि सञ्चालनमा आउनेछ। यसमा कृषि र पशुपालनमा व्यावसायिक उत्पादन, पूर्वाधार निर्माण, किसानलाई तालिम, उत्पादन वृद्धि र अनुदान वितरणजस्ता योजना समेटिएका छन्।

किसानको आम्दानी बढाउँदै कृषिमा रोजगारी सिर्जना गर्ने र कृषि वस्तुमा देशलाई आत्मनिर्भर बनाउने लक्ष्य परियोजनाले लिएको छ। यसको तयारीमा विगतका अनुभव र प्रगतिलाई आधार मानिएको छ। कार्यक्रम व्यवस्थापन एकाइका सूचना अधिकारी जितबहादुर चन्दका अनुसार परियोजनाबारे विभिन्न सरोकारवालासँग समीक्षा गरिसकिएको छ।

आर्थिक वर्ष २०७३/७४ मा सुरु भएको पहिलो चरणका लागि करिब ५६ अर्ब ३५ करोड रुपैयाँ छुट्याइएको थियो। करिब एक दशक चलेर आर्थिक वर्ष २०८२/८३ मा सकिएको उक्त चरणले करिब २३ लाख ८३ हजार रोजगारी सिर्जना गरेको एकाइले जनाएको छ।