बेनी–जोमसोम सडक अवरुद्ध, मुस्ताङको स्याउ बिक्री सुस्त

बेनी–जोमसोम सडक लामो समय अवरुद्ध हुँदा मुस्ताङको स्याउ अपेक्षाअनुसार बिक्री हुन सकेको छैन। स्याउ धेरै खपत हुने मुख्य मौसममा सडक बन्द भएकाले उत्पादन जिल्लामै अड्किएको थियो। घटस्थापनाको दुई दिनअघि मात्र सडक सञ्चालनमा आएको थियो।

दसैँको अन्तिम चरणमा सबै स्याउ एकैपटक बजार पुग्दा व्यापारीलाई बिक्री गर्न कठिन भएको छ। पोखरा, काठमाडौँलगायतका फलफूल बिक्रेताका गोदाममा केही महिनादेखि मुस्ताङको स्याउ थुप्रिएको छ। बिक्री सुस्त हुँदा स्याउ बोटमै झर्न थालेको छ।

धादिङको खनियाबाँस गाउँपालिका–३ का व्यापारी राजु तामाङले मुस्ताङबाट करिब १ करोड रुपैयाँभन्दा बढीको स्याउ किनेकोमा अहिलेसम्म आधा मात्र बिक्री भएको बताउनुभएको छ। किसानलाई भुक्तानी गरिसकेकाले लगानी कसरी उठ्ने भन्ने चिन्तामा परेको उहाँको भनाइ छ।