विद्युत् व्यापारका लागि निजी क्षेत्रलाई आशयपत्र दिने निर्णयको इप्पानद्वारा स्वागत

स्वतन्त्र ऊर्जा उत्पादकहरूको संस्था, नेपाल (इप्पान) ले सरकारको एउटा निर्णयको स्वागत गरेको छ। सरकारले अन्तरदेशीय विद्युत् व्यापारको तयारीका लागि निजी क्षेत्रलाई आशयपत्र दिने निर्णय गरेको हो।

इप्पानका अनुसार अहिलेसम्म निजी क्षेत्र बिजुली उत्पादनमा मात्र सीमित थियो। यो निर्णयले निजी क्षेत्रलाई पहिलो पटक बजार खोज्ने, साझेदार पहिचान गर्ने र विद्युत् खरिदबिक्री सम्झौताको तयारी गर्ने बाटो खोलेको छ।

निर्णयको स्वागत गर्दै इप्पानले विद्युत् व्यापारका लागि चाहिने अनुमतिपत्र पनि सुनिश्चित गर्न सरकारसँग माग गरेको छ।

निजी क्षेत्रले उत्पादन गरेको बिजुली विदेशमा बेच्ने तयारीलाई यो निर्णयले अघि बढाउने इप्पानको भनाइ छ।