हाटबजार राजस्व हिनामिना: गोलबजारका तत्कालीन मेयरसहित ७ जनाविरुद्ध भ्रष्टाचार मुद्दा

अख्तियार दुरुपयोग अनुसन्धान आयोगले सिरहाको गोलबजार नगरपालिकाका तत्कालीन नगरप्रमुख देवनाथ साहु तेलीसहित सात जनाविरुद्ध भ्रष्टाचार मुद्दा दायर गरेको छ।

नगरपालिकामा पशु, बाख्रा र गुदरी हाटबजारको ठेक्का तथा राजस्व संकलनमा १ करोड ६० लाख रुपैयाँभन्दा बढी हिनामिना गरेको ठहर गर्दै आयोगले मुद्दा दायर गरेको हो।

प्रतिवादी बनाइएकामा तत्कालीन नगरप्रमुख तेलीसँगै उपप्रमुख रेशम कुमारी थारू, तत्कालीन प्रमुख प्रशासकीय अधिकृतद्वय श्रीधर केसी र अनन्त कुमार पौड्याल तथा तत्कालीन निमित्त प्रमुख प्रशासकीय अधिकृतलगायत छन्।

आयोगका प्रवक्ताका अनुसार उनीहरूविरुद्ध हाटबजारको राजस्वसम्बन्धी अनियमितताको आरोपमा मुद्दा चलाइएको हो।