जापानका लागि प्रस्तावित राजदूतबारे सुनुवाइ समितिले थप विवरण माग्यो

संसदीय सुनुवाइ समितिले जापानका लागि राजदूतमा प्रस्तावित जिज्ञानकुमार थापाको नाम पारित गर्नुअघि दुई विषयमा थप विवरण मागेको छ। समितिले परराष्ट्र मन्त्रालयमार्फत जापानस्थित नेपाली दूतावाससँग यो जानकारी खोजेको हो। पहिलो विषय थापाले जापानको स्थायी आवासीय अनुमतिपत्र अर्थात् पिआर त्यागेको हो कि होइन भन्ने छ।

यसबारे समितिले यसअघि नै विवरण मागिसकेको थियो। दोस्रो, उहाँले जापान सरकारको कोषबाट तलब सुविधा लिनुभएको थियो कि थिएन भन्नेबारे समितिले कात्तिक ९ गते छुट्टै पत्र पठाएको छ। थापाले असोज २८ गते समितिसमक्ष आफ्नो कार्ययोजना राख्नुभएको थियो र सांसदका प्रश्नको जवाफ पनि दिनुभएको थियो।

त्यसबेला १० देशका प्रस्तावित राजदूतको नाम पारित गर्दा समितिले थापाको नाम भने रोकेको थियो। समितिले साउदी अरब र मलेसियाका लागि प्रस्तावित राजदूतको नाम अस्वीकृत गरेको थियो। थापाबारे समितिले कात्तिक १८ गतेभित्र निर्णय गर्नुपर्नेछ।