सशस्त्र प्रहरीका एआईजी वंशीराज दाहाल सेवाबाट बर्खास्त

गृह मन्त्रालयले सशस्त्र प्रहरी बलका अतिरिक्त महानिरीक्षक वंशीराज दाहाललाई सेवाबाट बर्खास्त गरेको छ। विभागीय कारबाहीअन्तर्गत उनलाई आज असोज २३ गतेदेखि लागू हुने गरी हटाइएको छ। मन्त्रालयका सहसचिव तथा प्रवक्ता आनन्द काफ्लेले शुक्रबार विज्ञप्ति जारी गर्दै यो जानकारी दिएका छन्।

दाहालले आचरणसम्बन्धी व्यवस्था पटकपटक उल्लंघन गरेको र अनुशासनहीन काम गरेको ठहर भएको छ। सरकार र आफू कार्यरत संगठनको प्रतिष्ठामा आँच पुर्‍याएको कुरा पनि निर्णयको आधार बनेको छ। छानबिन समितिले दिएको प्रतिवेदनका आधारमा यो कारबाही भएको छ।

कारबाहीअघि नै उनी निलम्बनमा परिसकेका छन्। गृहमन्त्रीको सचिवालयले बर्खास्तीबारे चारबुँदे स्पष्टीकरणसमेत सार्वजनिक गरेको छ।