इनम सापकोटासँग सम्पर्क भएको न्यायाधीश फुयालको स्वीकारोक्ति, शुक्रबार फूल कोर्ट बैठक

सर्वोच्च अदालतका न्यायाधीश हरिप्रसाद फुयालले कथित बिचौलिया इनम सापकोटासँग सम्पर्क भएको स्वीकार गरेका छन्। सापकोटाले आफूलाई प्रधानमन्त्री बालेन शाहको विशेष प्रतिनिधिका रूपमा परिचय दिएको उनले बताएका छन्।

बिहीबार संवाददातासामु प्रस्तुत भएका न्यायाधीश फुयालले आफूले कुनै सेटिङ नगरेको र मुद्दा प्रभावित नपारेको दाबी गरे। अनलाइनखबरका अनुसार उनले ५-७ जना न्यायाधीशमाझ इनमले महाभियोगको खतरा नहुने आश्वासन दिएको बताएका छन्। उनले आफ्नो वक्तव्यमा आफूबाट न्यायपालिकाको प्रतिष्ठामा आँच पुग्ने काम नभएको उल्लेख गर्दै आफूबारे आएका तथ्य र समाचारलाई देश र न्यायक्षेत्रको अस्थिरता र असुरक्षाभन्दा बाहिरबाट नहेर्न अनुरोध गरेका छन्।

यसैबीच प्रधानन्यायाधीश डा. मनोजकुमार शर्माले शुक्रबार बिहान फूल कोर्टको बैठक बोलाएका छन्। बैठकको एजेन्डामा ‘समसामयिक विषयमा छलफल’ मात्र उल्लेख छ। बिहीबार प्रधानन्यायाधीशले केही न्यायाधीश र न्याय प्रशासनका उच्चपदस्थ अधिकारीसँग छलफल गरेपछि बैठकको सूचना जारी भएको हो।

सापकोटा पूर्वप्रधानन्यायाधीश चोलेन्द्रशमशेर जबरासँगको सम्बन्धका कारण बिचौलियाका रूपमा पक्राउ परेका थिए।