मेची–महाकाली पैदल यात्रा गर्ने सांसद अमरेशकुमार सिंहको घोषणा

राष्ट्रिय स्वतन्त्र पार्टीका सांसद डा. अमरेशकुमार सिंहले छठ पर्वपछि मेचीदेखि महाकालीसम्म पैदल यात्रा गर्ने घोषणा गर्नुभएको छ। आइतबार जनकपुरधाममा आयोजित पत्रकार सम्मेलनमा उहाँले छठको पारणका दिन गंगासागरमा अर्घ्य दिई जानकी मन्दिरको दर्शन गरेपछि झापाको भद्रपुरबाट यात्रा सुरु गर्ने बताउनुभएको छ।

यात्रा गाडी वा रथमा नभई पैदल नै हुने उहाँले जनाउनुभएको छ। गाउँ–गाउँ र टोल–टोल पुगेर जनतासँग प्रत्यक्ष संवाद गर्नु र उनीहरूका समस्या सुन्नु यात्राको मुख्य उद्देश्य रहेको उहाँको भनाइ छ। मञ्च बनाएर भाषण गर्नुभन्दा स्थानीयका कुरा सुन्ने र आफू कम बोल्ने योजना रहेको उहाँले बताउनुभएको छ।

मधेशको अबको बाटो एकता, शान्ति र समृद्धिको हुनुपर्ने उहाँले उल्लेख गर्नुभएको छ। मधेश र कोशी प्रदेशलाई ब्याटल ग्राउन्ड बनाउन देशभित्र र बाहिरका शक्ति सक्रिय रहेको दाबी गर्दै उहाँले मधेशलाई जात, धर्म, भूगोल वा राजनीतिको नाममा विभाजित गरी द्वन्द्वको मैदान बनाउन नहुने बताउनुभएको छ। मधेशका जनताको प्रमुख आवश्यकताका रूपमा शिक्षा, स्वास्थ्य, सडक, सिँचाइ, सरसफाइ तथा शान्ति सुरक्षालाई प्राथमिकतामा राख्नुपर्ने उहाँको भनाइ छ।