कांग्रेस वडा अधिवेशन असोज ३ देखि, महाधिवेशन प्रतिनिधि झन्डै सात हजार

नेपाली कांग्रेसको १५औँ महाधिवेशनअन्तर्गत असोज ३ र ४ गतेदेखि सुरु हुने वडा अधिवेशनका लागि आवश्यक सबै तयारी सकिएको पार्टीको केन्द्रीय निर्वाचन समितिले जनाएको छ। बुधबार सानेपामा पत्रकार सम्मेलन गर्दै समितिले वडापछिका तहगत अधिवेशनको तयारीसमेत पूरा भएको जानकारी दिएको छ। केन्द्रीय महाधिवेशन असोज १६ गतेदेखि १९ गतेसम्म हुनेछ।

सदस्यसचिव राजु कटुवालले प्रदेशसभा क्षेत्र सभापति र पालिका सभापतिसमेत गरी करिब ६ हजार ५ सय जना प्रतिनिधि चयन हुने अनुमान रहेको बताउनुभएको छ। विदेशस्थित जनसम्पर्क समिति, भ्रातृ संस्था तथा शुभेच्छुक संस्थाका प्रतिनिधि थप्दा यो सङ्ख्या करिब ७ हजार पुग्ने उनको भनाइ छ। २०७८ मंसिरमा भएको १४औँ महाधिवेशनमा करिब ४ हजार ७ सय प्रतिनिधि थिए।

गत पुसको विशेष महाधिवेशनले विधान संशोधन गरेपछि प्रदेशसभा क्षेत्रीय सभापति र पालिका सभापति पनि पहिलोपटक महाधिवेशन प्रतिनिधि बन्ने भएकाले सङ्ख्या बढेको हो। प्रत्येक प्रतिनिधिसभा निर्वाचन क्षेत्रबाट आउने प्रतिनिधि सङ्ख्या पनि बढाइएको छ। यी व्यवस्था लागू हुँदा अघिल्लो महाधिवेशनको तुलनामा झन्डै १७ सयभन्दा बढी प्रतिनिधि थपिनेछन्।

कटुवालका अनुसार रसुवा, नुवाकोट, धादिङलगायत केही ठाउँबाहेक कांग्रेसमा करिब ८ लाख ७० हजार क्रियाशील सदस्य छन्। यो महाधिवेशन प्रक्रियामार्फत देशभर साढे ३ लाखभन्दा बढी निर्वाचित नेतृत्व चयन हुनेछ। पार्टीले यसपटकको महाधिवेशनलाई प्रविधिमैत्री र चुस्त बनाउने दाबी गरेको छ।