ओली पक्षको दाबी: बोल्ने अधिकांश सदस्यले प्रतिवेदन समर्थन गरे

नेकपा एमालेका सचिव महेश बस्नेतले ललितपुरमा जारी केन्द्रीय कमिटी बैठकमा अध्यक्ष केपी शर्मा ओलीको राजनीतिक प्रतिवेदनलाई बोल्ने अधिकांश सदस्यले समर्थन गरेको दाबी गर्नुभएको छ। मंगलबार सञ्चारकर्मीसँग कुरा गर्दै उहाँले बोल्ने सदस्यमध्ये ८० प्रतिशतभन्दा बढीले प्रतिवेदनको पक्षमा धारणा राखेको दाबी गर्नुभयो। दिनभरको बैठकमा करिब ९६ जना केन्द्रीय सदस्यले बोलेको उहाँको भनाइ छ।

बस्नेतले पार्टीभित्र कुनै विद्रोह वा नेतृत्व परिवर्तनको एजेन्डा नरहेको र पुनर्गठन भनेको अध्यक्ष फेर्ने विषय नभएको स्पष्ट पार्नुभयो। उपाध्यक्ष विष्णु पौडेल र महासचिव शंकर पोखरेलले पनि आफूहरू विद्रोहको पक्षमा नरहेको बैठकमा बताएको उहाँले जानकारी दिनुभयो। पार्टीभित्रकै केही नेताले राज्यका संयन्त्र दुरुपयोग गरी अध्यक्षविरुद्ध अभियान चलाएको आरोप पनि उहाँले लगाउनुभयो।

केन्द्रीय सदस्य रामकुमारी झाँक्रीले ठूला दलहरूमा नेतृत्व परिवर्तनको बहस ‘फेसन’ जस्तै बनेको टिप्पणी गर्नुभएको छ। अर्का केन्द्रीय सदस्य गोकुल बाँस्कोटाले अध्यक्षको आत्मालोचनासहितको प्रतिवेदनलाई ढिलै भए पनि स्वागतयोग्य भन्दै त्यसको सफलता व्यावहारिक कार्यान्वयनमा निर्भर रहने बताउनुभएको छ। नेतृत्व हस्तान्तरणको बहस अर्को महाधिवेशनमा फेरि उठ्ने उहाँको भनाइ छ।

बस्नेतका अनुसार प्रतिवेदनले राष्ट्रिय–अन्तर्राष्ट्रिय परिवेशको विश्लेषणसँगै पार्टीभित्रका समस्या उजागर गर्दै भावी कार्यदिशा तय गरेको छ। पार्टीलाई कार्यकर्तामा आधारित बनाउँदै सङ्गठनात्मक संरचना र जनसंगठन थप मजबुत पार्ने उहाँले बताउनुभयो।