कांग्रेसमा नेतृत्व बहस: गगनको विकल्प छैन, देउवा सम्मानित अभिभावक

नेपाली कांग्रेसकी उपसभापति पुष्पा भुसालले पार्टीको आगामी नेतृत्वमा सभापति गगनकुमार थापाको विकल्प नरहेको बताउनुभएको छ। रिपोर्टर्स क्लब नेपाल लुम्बिनी प्रदेशले अर्घाखाँचीको सन्धिखर्कमा आयोजना गरेको कार्यक्रममा बोल्दै उहाँले सभापतिमा थापा सर्वसम्मत रूपमा चयन हुने दाबी गर्नुभयो। कार्यकर्ता र आम जनताले थापालाई सभापतिकै भूमिकामा हेर्न चाहेको उहाँको भनाइ छ।

उपसभापति भुसालले पूर्वसभापति शेरबहादुर देउवालाई पार्टीको सम्मानित अभिभावकका रूपमा स्वीकार गर्न आफूहरू तयार रहेको स्पष्ट पार्नुभयो। अभिभावक मानेकै कारण देउवालाई अधिवेशनमा सहभागिताका लागि निम्तो दिइएको र उहाँको उपस्थितिले पार्टी बलियो बनाउन सहयोग पुग्ने भुसालले बताउनुभएको छ। महाधिवेशनमा सहभागी हुन नसकेका तथा असन्तुष्ट नेतालाई समेट्न आवश्यक परे विधानका धारा निलम्बन गरेर भए पनि सम्मानजनक स्थान दिइने उहाँको प्रतिबद्धता छ।

उहाँले १५औँ महाधिवेशनलाई एकताको महाधिवेशन बनाउँदै गुट–उपगुटको अन्त्य गर्नुपर्ने र अग्रजलाई सम्मान तथा युवालाई जिम्मेवारी दिनुपर्ने धारणा राख्नुभयो। आन्तरिक समस्याको निकास खोज्दै संगठन मजबुत पार्नु र कांग्रेसलाई फेरि जनताको पार्टी बनाउनु अहिलेको मुख्य दायित्व रहेको उहाँले बताउनुभयो। पार्टी आन्तरिक रूपमा सुदृढ भए मात्र मुलुकमा लोकतान्त्रिक मूल्यको रक्षा हुने उहाँको धारणा छ।