धौलीगंगा बाँधका ढोका ४८ घण्टा खुला गरिने, महाकाली किनारमा सतर्क रहन आग्रह

भारतको धौलीगंगा जलविद्युत् आयोजनाको बाँधका ढोका ४८ घण्टाका लागि खोलिने भएपछि महाकाली नदीको तटीय क्षेत्रमा सतर्कता अपनाउन आग्रह गरिएको छ। उत्तराखण्डको धारचुलामा रहेको उक्त आयोजनाले बाँधमा थुप्रिएको सिल्ट सफा गर्न ढोका खोल्न लागेको जिल्ला प्रशासन कार्यालय कञ्चनपुरले शुक्रबार महेन्द्रनगरबाट जारी गरेको सूचनामा उल्लेख छ। प्रशासनका अनुसार असोज १७ गते शनिबार राति १ बजेदेखि असोज १९ गते सोमबार राति १ बजेसम्म ढोका खुला रहनेछन्।

यस अवधिमा महाकालीमा पानीको सतह बढ्न सक्ने प्रशासनले जनाएको छ। सहायक प्रमुख जिल्ला अधिकारी मोहनचन्द्र जोशीले तटीय बस्तीका स्थानीयलाई पहिल्यै सावधानी अपनाउन अनुरोध गरिएको जानकारी दिनुभएको छ। नदी किनारमा बसोबास गर्ने र नदी हुँदै आवतजावत गर्ने नागरिकलाई ढोका खुला रहँदा नदीमा नउत्रिन र किनारतिर नजान प्रशासनले भनेको छ।

ढोका बन्द भइसकेपछि पनि केही समयसम्म नदीको सतह उच्च रहन सक्ने भएकाले सतर्कता कायम राख्न आग्रह गरिएको छ। जल तथा मौसम विज्ञान विभागका अनुसार आज सुदूरपश्चिम प्रदेशको पहाडी भू-भागका एक–दुई स्थानमा हल्का वर्षाको सम्भावना छ भने भोलि त्यहाँको हिमाली र पहाडी भागमा आंशिक बदली रहनेछ।