संरचनागत सुधारबिना वायुसेवा निगममा जहाज थप्नुको औचित्य छैन : पर्यटनमन्त्री पौडेल

संस्कृति, पर्यटन तथा नागरिक उड्डयनमन्त्री खडकराज पौडेलले संरचनागत सुधार नगरी नेपाल वायुसेवा निगममा थप जहाज भित्र्याउनुको कुनै औचित्य नहुने बताएका छन्। शुक्रबार बोल्दै उनले निगम नाफा कमाउने संस्था मात्र नभई राष्ट्रिय गौरव र ध्वजावाहक भएकाले यसलाई जोगाउन कठोर निर्णय लिनुपर्ने बेला आएको बताए।

निगमले चारवटा इन्जिन मर्मतका लागि करिब आठ अर्ब रुपैयाँ आवश्यक रहेको औंल्याउँदै खरिद प्रक्रियामा रहेका नीतिगत जटिलता फुकाइदिन सरकारसँग आग्रह गरेको छ। निगम उच्च ब्याजदरको ऋणभार, जहाज विस्तारमा ढिलाइ र प्राविधिक जनशक्तिको अभावका कारण गम्भीर संकटमा परेको छ। कर्मचारी सञ्चय कोष र नागरिक लगानी कोषबाट लिइएको ऋणको ब्याजदर पनि निगमका लागि भार बनेको छ।

प्रतिनिधिसभाको अन्तर्राष्ट्रिय सम्बन्ध र पर्यटन समितिको शुक्रबारको बैठकमा सांसदहरूले निगमको अवस्थाप्रति चिन्ता जनाए। एमाले सांसद डा. अर्जुनकुमार कार्कीले निगमको कार्यसम्पादनलाई ‘लज्जास्पद’ भन्दै संरचनागत सुधार र फ्लीट विस्तारको माग गरे। रास्वपा सांसद प्रशान्त उप्रेतीले ‘ग्रे जोन’मा राखेर ध्वजावाहकको उन्नति नहुने बताए।

कांग्रेस सांसद सन्दीप रानाले सरकारी संस्थानहरू ‘नियुक्ति खाने’ थलो बनेको टिप्पणी गरे। नेकपा सांसद गणेशबहादुर विश्वकर्माले महँगो हवाई भाडाले पर्यटक आगमनमा असर परेको भन्दै हतारमा निर्णय लिनुभन्दा विज्ञको सहभागितामा कार्ययोजना बनाउन सुझाव दिए।