कांग्रेस अधिवेशन: वर्षाले प्रभावित, बाजुरामा सर्वसम्मति, सुनवलमा मतदान स्थगित

नेपाली कांग्रेसको १५औँ महाधिवेशनअन्तर्गतका अधिवेशन अविरल वर्षाका कारण केही जिल्लामा प्रभावित भएका छन्। निर्वाचन अधिकृतहरूका अनुसार दाङ, स्याङ्जा, कास्की, तनहुँ, काभ्रे, रामेछाप र ओखलढुङ्गालगायत जिल्लामा अधिवेशनका कार्यक्रम चलाउन कठिनाइ भइरहेको छ। पार्टीले मौसम अनुकूल भएका ठाउँमा असोज १० गते नै प्रदेश सभा र प्रतिनिधि सभा क्षेत्रीय अधिवेशनको निर्वाचन गर्न निर्देशन दिएको छ।

मौसम प्रतिकूल भएका ठाउँमा भने जिल्ला र क्षेत्रीय कार्यसमितिसँग समन्वय गरी असोज १३ गतेभित्र निर्वाचन सक्नुपर्ने छ। वडा अधिवेशन सकिएको छ भने गाउँ र नगर अधिवेशन अधिकांश ठाउँमा सम्पन्न भएको छ। वडा तहमा अधिकांश नेतृत्व सर्वसम्मत रूपमा चुनिएको छ, तर माथिल्लो तहमा प्रतिस्पर्धा बढ्न थालेको छ।

विशेष महाधिवेशनले संशोधन गरेको विधानमा विभिन्न समूहको अनिवार्य प्रतिनिधित्व राखिएकाले वडामा प्रतिस्पर्धा घटेको नेताहरूको भनाइ छ। प्रवक्ता देवराज चालिसेका अनुसार वडादेखि केन्द्रसम्म पहिलोपटक युवाका लागि अनिवार्य आरक्षण राखिएको छ र यसबाट करिब १५ देखि १६ हजार युवा पार्टी संरचनामा पुग्नेछन्। बाजुरामा पार्टी उपसभापति पदम बडुवालका अनुसार ६९ मध्ये ६७ वडा र नौमध्ये सात पालिकामा सर्वसम्मत नेतृत्व आएको छ।

त्रिवेणी र बूढीगङ्गामा सहमति खोज्ने प्रयास जारी छ। पश्चिम नवलपरासीको सुनवल नगर अधिवेशनमा भने दुई दिनको सहमति प्रयास विफल भएपछि बिहीबार थालिएको मतदान विवादका कारण स्थगित भएको छ।