महाकालीमाथिको दोधारा–चाँदनी झोलुङ्गे पुलको पिल्लर भाँचियो, प्राविधिक अध्ययन सुरु

कञ्चनपुरको महाकाली नदीमाथिको दोधारा–चाँदनी झोलुङ्गे पुलको एउटा पिल्लर भाँचिएपछि भीमदत्त नगरपालिका र दोधारा–चाँदनी नगरपालिकाबीचको आवागमन पूर्ण रूपमा बन्द भएको छ। जिल्ला प्रहरी कार्यालय कञ्चनपुरका अनुसार बुधबार बिहान नदीको बहाव बढेपछि दोधारातर्फको पिल्लर भत्किएको हो। प्रहरीका अनुसार पुलको करिब ५ देखि ६ मिटर भाग माथितिर उठेकाले पैदल हिँड्न पनि जोखिमपूर्ण बनेको छ।

घटनास्थलमा प्रहरी टोली परिचालन गरिएको प्रहरी नायब उपरीक्षक टेकबहादुर रावतले बताउनुभएको छ। पुलमा क्षति कसरी पुग्यो भन्ने पत्ता लगाउन प्राविधिक अध्ययन गरिने प्रमुख जिल्ला अधिकारी मदन कोइरालाले बताउनुभएको छ। सुदूरपश्चिम प्रदेशको यातायात पूर्वाधार निर्देशनालयका निर्देशक जगतप्रसाद जोशीका अनुसार झोलुङ्गे पुलका विज्ञ इन्जिनियर प्रकाश बमसहितको प्राविधिक टोलीले स्थलगत अध्ययन थालेको छ।

मुख्यमन्त्री खगराज भट्ट र प्रदेश भौतिक पूर्वाधार विकास मन्त्रालयको टोली पनि अनुगमनका लागि पुलस्थलतर्फ गएको छ। कञ्चनपुर–३ का सांसद ज्ञानेन्द्रसिंह महताले प्रतिनिधिसभामा यो विषय उठाउँदै पुल तत्काल सञ्चालनमा ल्याउन माग गर्नुभएको छ। उहाँका अनुसार बाढीले पुलको बीचको टावर ब्लक र स्पर क्षेत्रमा क्षति पुर्‍याउँदा करिब ७५ मिटर भाग क्षतिग्रस्त भएको छ।

नेपाली कांग्रेसका नेता रमेश लेखकले सरकारलाई यथाशीघ्र पुनर्निर्माण थाल्न आग्रह गर्नुभएको छ। झन्डै डेढ किलोमिटर लामो यो पुललाई एसियाकै दोस्रो लामो झोलुङ्गे पुलका रूपमा चिनिन्छ। करिब दुई दशकअघि यो पुल बनेपछि दोधारा–चाँदनी देशका अन्य भागसँग सिधै जोडिएको थियो।