सिक्किमको रिम्बीमा फेरि ठूलो पहिरो, ३० भन्दा बढी घर प्रभावित

भारतको सिक्किमस्थित ग्यालसिङ जिल्लाको रिम्बी क्षेत्रमा बिहीबार राति गएको ठूलो पहिरोले ३० भन्दा बढी घर प्रभावित भएका छन्। युक्सोम–ताशीडिङ क्षेत्रमा लगातार वर्षापछि गएको पहिरोले माटो, ढुङ्गा र गेग्रान बस्तीसम्म पुर्‍याएको छ। पहिरोले विद्युत् विभागका सरकारी आवाससहित केही संरचनामा क्षति पुर्‍याएको छ।

कैयौँ परिवार घर छाडेर सुरक्षित ठाउँमा जान बाध्य भएका छन्। सिक्किमका मुख्यमन्त्री प्रेमसिंह तामाङले अवस्था गम्भीर रहेको र जनताको सुरक्षा तथा कल्याण सरकारको पहिलो प्राथमिकता भएको बताउनुभएको छ। उहाँका अनुसार प्रशासनले अवस्थामाथि नजिकबाट निगरानी गरिरहेको छ।

भारी वर्षा पहिरोको तत्कालको कारण भए पनि यस क्षेत्रको भौगोलिक बनोट, पानीको दबाब, पानी निकासको अवस्था र माटोको प्रकृतिले जोखिम बढाएको बताइएको छ। मौसम विभागले आगामी दिनमा पनि भारी वर्षाको पूर्वानुमान गरेकाले अस्थिर बनेको रिम्बीमा थप पहिरोको जोखिम बढेको छ। स्थानीय बासिन्दामा अझै त्रास कायमै छ।