खनिज विधेयक लगानीमैत्री बनाउनुपर्छ: उद्योगमन्त्री साह

खानी तथा खनिज पदार्थ विधेयक, २०८३ लगानीमैत्री हुनुपर्नेमा उद्योग, वाणिज्य तथा आपूर्तिमन्त्री दीपककुमार साहले जोड दिनुभएको छ। संसदको उद्योग तथा वाणिज्य र श्रम तथा उपभोक्ता हित समितिमा आज विधेयकबारे भएको सैद्धान्तिक छलफलमा उहाँले यस्तो धारणा राख्नुभएको हो। मन्त्री साहका अनुसार कानुन लगानीमैत्री बने एक वर्षभित्रै विदेशी लगानीकर्ता भित्र्याउन सकिन्छ।

कानुन आफैँमा सफल देखिए पनि उद्योग नै चल्न नसक्ने स्थिति आउन नहुने उहाँको भनाइ छ। उहाँले कच्चा खनिज सोझै बाहिर पठाउनुको साटो प्रशोधन गरी मूल्य अभिवृद्धि गर्नुपर्ने बताउनुभएको छ। उत्खननबाट निस्कने उपउत्पादनको पनि मूल्य अभिवृद्धि गरी औद्योगिक उत्पादनसँग जोड्नुपर्ने उहाँको सुझाव छ।

उत्खनन वैज्ञानिक ढङ्गले, वातावरणमैत्री तरिकाले र सामाजिक सुरक्षाको ख्याल गरेर हुनुपर्ने तथा सङ्घ, प्रदेश र स्थानीय तहको अधिकार ऐनमै प्रस्ट लेख्नुपर्ने पनि मन्त्री साहले बताउनुभएको छ। सोही बैठकमा समितिका सभापति रहबर अन्सारीले विधेयकले देशमा पुँजी निर्माण, रोजगारीका अवसर र औद्योगिक विकासलाई टेवा दिने गरी अघि बढ्नुपर्ने बताउनुभएको छ। उहाँले खानी तथा भूगर्भ विभागलाई अन्वेषण, उत्खनन र अनुसन्धानसम्बन्धी अड्किएका फाइल कति छन् र किन रोकिए भन्ने विवरण पेस गर्न निर्देशन दिनुभएको छ।

सभापति अन्सारीले ‘जिरो पेन्डिङ फाइल’ अवधारणा कडाइका साथ लागू गर्दै खानी क्षेत्रमा लगानीकर्ताका लागि सहज वातावरण बनाउनुपर्नेमा जोड दिनुभएको छ।