सञ्चारमन्त्री तिमिल्सिनासँग कोरियाली राजदूतको भेट

गणतन्त्र कोरियाका नेपालस्थित राजदूत पार्क जे–ख्योङले सूचना तथा सञ्चारमन्त्री डा. विक्रम तिमिल्सिनासँग आज शिष्टाचार भेट गर्नुभएको छ। मन्त्रीको कार्यकक्षमा भएको भेटमा दुई देशबीचको सम्बन्ध, भोटेकोशी बाढी प्रभावितको उद्धार, पुनःस्थापना र सहायताका विषयमा छलफल भएको छ।

सूचना प्रविधि, डिजिटल अर्थतन्त्र र कृत्रिम बौद्धिकतामा सहकार्य गर्नेबारे पनि कुराकानी भएको छ। भोटेकोशी बाढीको कठिन घडीमा कोरियाले देखाएको सहानुभूति र सहयोगप्रति मन्त्री तिमिल्सिनाले आभार प्रकट गर्नुभएको छ। उद्धार र खोजीका लागि कोरियाले विपद् व्यवस्थापन टोली परिचालन गरेकोमा पनि उहाँले धन्यवाद दिनुभएको छ।

बाढी प्रभावितलाई सहयोग गर्ने तथा पुनर्निर्माण र पुनःस्थापनामा सघाउने कोरियाली सरकारको प्रतिबद्धताप्रति पनि उहाँले कृतज्ञता जनाउनुभएको छ। आपसी सम्मान, समझदारी र सहकार्यमा आधारित नेपाल–कोरिया मैत्री सम्बन्धलाई आगामी दिनमा अझ फराकिलो बनाउनुपर्नेमा मन्त्री तिमिल्सिनाले जोड दिनुभएको छ।