बाढी प्रभावित बालबालिकाका लागि दीर्घकालीन स्याहार योजना

भोटेकोशी बाढीबाट प्रभावित र विशेष संरक्षण चाहिने बालबालिकाका लागि सरकारले दीर्घकालीन स्याहार योजना सुरु गरेको छ। महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षामन्त्री सीता बादीले बिहीबार प्रतिनिधिसभा बैठकमा यो जानकारी दिनुभएको छ। भदौ १० गते भोटेकोशी र त्रिशूली नदीमा आएको बाढीले ठूलो जनधनको क्षति गरेको र नागरिक विस्थापित भएको उहाँले बताउनुभएको छ।

बालबालिकाको खोजी, उद्धार, संरक्षण, अभिभावक खोजी र परिवारसँग पुनर्मिलन सरकारको प्राथमिकतामा रहेको मन्त्री बादीको भनाइ छ। उहाँका अनुसार प्रभावित करिब १५ स्थानीय तहमा बाल संरक्षण समन्वय संयन्त्र बनाइएको छ भने करिब ४० स्थानमा बालमैत्री केन्द्र चलाइएका छन्। ललितपुरको गोदावरी नगरपालिका–१२, ठेचोमा उद्धार गरिएका बालबालिकाका लागि आवास, खानपान, मनोसामाजिक सहयोग र परिवार खोजीको व्यवस्था गरिएको छ।

मन्त्री बादीका अनुसार अहिलेसम्म झन्डै ६ हजार ५ सय बाढीप्रभावितले मनोसामाजिक प्राथमिक सहयोग पाएका छन्। उद्धारमा खटिएका करिब १५५ कर्मचारी र सुरक्षाकर्मीलाई तनाव व्यवस्थापन तालिम दिइएको छ। राहत बाँड्ने नाममा प्रभावितको सहमतिबिना फोटो र भिडियो खिचेर सामाजिक सञ्जालमा राख्ने चलन रोक्न पनि उहाँले आग्रह गर्नुभएको छ।