कांग्रेस अधिवेशनको मिति स्थानीय चुनाव हेरेर तोकिने: सभापति थापा

नेपाली कांग्रेसका सभापति गगन थापाले पार्टीका प्रदेश र जिल्ला अधिवेशनको मिति आगामी स्थानीय तह निर्वाचनलाई ध्यानमा राखेर तोकिने बताउनुभएको छ। पोखरामा आयोजित कार्यक्रममा उहाँले केन्द्रीय समितिको बैठकमा छलफल गरेर मिति तय गरिने जानकारी दिनुभएको छ। असोज १८ देखि २३ गतेसम्म भएको १५औँ महाधिवेशनबाट १३१ जना निर्वाचित भएका छन् भने सभापतिले ६६ जना मनोनीत गर्न बाँकी छ।

केन्द्रीय कार्यसमिति २९७ सदस्यीय हुनेछ। बाँकी पदाधिकारी र केन्द्रीय सदस्यले कात्तिक १२ गते सानेपास्थित केन्द्रीय कार्यालयमा शपथ लिने कार्यक्रम छ। सभापति थापाका अनुसार यसपटक स्थानीय तहका उम्मेदवार केन्द्रले होइन, सम्बन्धित क्षेत्रकै पार्टी सदस्यले छान्ने गरी विधानमा व्यवस्था गर्ने प्रक्रिया अघि बढाइएको छ।

केन्द्रीय सदस्यलाई काठमाडौँमा बस्न नदिई तल पठाइने उहाँको भनाइ छ। पछिल्लो निर्वाचनमा अर्को दललाई मत दिएका पुराना समर्थकसँग संवाद गर्न सभापति थापाले मंसिरभर अभियान चलाउने प्रस्ताव गर्नुभएको छ। नेता आउँदा खादा र माला बोकेर विमानस्थलमा लाइन लाग्ने चलन रोक्न निर्देशिका पठाइएको पनि उहाँले जानकारी दिनुभएको छ।

आफूलाई ४ वर्षका लागि दिइएको सभापतिको पद जिम्मेवारी मात्र भएको उहाँले उल्लेख गर्नुभएको छ।