दसैँ यात्रा: अग्रिम टिकट बुकिङको निर्णय भएन, पुराना गाडीकै भरमा यात्रु व्यवस्थापन

दसैँको घटस्थापना असोज २५ गते परेको छ, तर अग्रिम टिकट बुकिङ कहिलेदेखि खुल्ने भन्ने निर्णय अझै भएको छैन। यसबारे शनिबार बस्ने बैठकले निर्णय गर्ने सरकारले जनाएको छ। केही महिनादेखि सवारी दर्ता प्रक्रिया अवरुद्ध भएकाले यसपालि नयाँ सार्वजनिक सवारी थपिन सकेका छैनन्।

प्रतिनिधिसभाको पूर्वाधार विकास समितिले सभापति आशिष गजुरेलको नेतृत्वमा दसैँ यात्रा व्यवस्थापनसम्बन्धी प्रतिवेदन पूर्वाधार विकासमन्त्री सुनिल लम्साललाई बुझाएको छ। समितिले करिब ६५ हजार सवारी परिचालन गर्नुपर्ने निष्कर्ष निकालेको छ। चाडपर्वमा काठमाडौँ उपत्यकाबाट मात्रै करिब १५ देखि १६ लाख यात्रु बाहिरिने अनुमान छ।

नेपाल प्रहरी प्रधान कार्यालयका अनुसार मुस्ताङको जोमसोम–कोरोला र रसुवाको पासाङ ल्हामु सडकसहित धेरै सडकखण्ड अझै पूर्ण रूपमा अवरुद्ध छन्। नेपाल यातायात व्यवसायी राष्ट्रिय महासङ्घका अध्यक्ष पुण्यप्रसाद सिटौलाले सडक नसुध्रिएसम्म अग्रिम टिकट खोल्नुको औचित्य नरहेको बताउनुभएको छ। क्षतिग्रस्त सडक तुरुन्त नबनाए र वित्तीय संस्थाको ऋण किस्ता तिर्न सहजता नदिए चाडपर्वमा यातायात व्यवस्थापन कठिन हुने व्यवसायीहरूको चेतावनी छ।

प्रशासनिक आदेशका भरमा मात्र सवारी चलाउन नसकिने भन्दै उहाँले सरकारसँग सडकको वास्तविक अवस्था बुझ्न आग्रह गर्नुभएको छ।