मलेसिया रोजगारी: एफडब्लुसिएमएस विवादमा म्यानपावरलाई विभागको सचेत पत्र, व्यवसायीको आपत्ति

मलेसियाको विदेशी श्रमिक केन्द्रीकृत व्यवस्थापन प्रणाली एफडब्लुसिएमएसमा सूचीकृत म्यानपावर कम्पनीलाई वैदेशिक रोजगार विभागले आबद्धता फिर्ता लिन सचेत गराएको छ। विभागले असोज १२ गते पठाएको पत्रमा भदौ २६ गतेको निर्देशन पालना नभएको उल्लेख छ। वैदेशिक रोजगार ऐन, २०६४ को दफा ५४ बमोजिम सचेत गराउँदै विभागले प्रणालीलाई पत्र लेखेर सात दिनभित्र जानकारी दिन निर्देशन दिएको छ।

ऐनको दफा ३७ अनुसार पनि फेरि निर्देशन दिइएको छ। मलेसियाले भदौ ५ गते नेपालसहित १० श्रम स्रोत मुलुकबाट भर्नाका लागि तोकिएका कम्पनीलाई प्रणालीमा राखेपछि विवाद सुरु भएको हो। नेपालबाट करिब २५ कम्पनी मुख्य र तिनका मातहत करिब २५० कम्पनी सहायकका रूपमा राखिएका छन्।

सीमित कम्पनीलाई मात्र भर्नाको अधिकार दिने यो संरचना नेपालको वैदेशिक रोजगार कानुनअनुकूल नभएको भन्दै सरकारले स्वीकार गरेको छैन। सरकारले पुरानै प्रक्रियाबाट श्रमिक पठाउन कूटनीतिक पहल थालेको छ। करिब आठ वर्षअघि श्रमिकमाथि अतिरिक्त शुल्क लगाइएको विवादका कारण मलेसिया रोजगारी झन्डै १५ महिना बन्द भएको थियो।

म्यानपावर व्यवसायीहरूले भने विभागको पत्रलाई अपरिपक्व निर्णय भन्दै आपत्ति जनाएका छन्।