पृथ्वी राजमार्ग फेरि सञ्चालनमा, देशभर १४ प्रमुख सडक अझै प्रभावित

लगातारको वर्षाले ल्याएको पहिरोका कारण अवरुद्ध पृथ्वी राजमार्ग पुनः सञ्चालनमा आएको छ। धादिङको गजुरी क्षेत्रमा खसेको पहिरो हटाएपछि राजमार्ग खुलेको पूर्वाधार विकास मन्त्रालयले जनाएको छ। गजुरी गाउँपालिका–२ चालिसे र वडा नम्बर ५ बाङ्गेमोडमा लेदोसहितको ठूलो पहिरो खसेको थियो।

कृष्णभीरलगायतका ठाउँको पहिरो भने यसअघि नै पन्छाइएको थियो। चामबासको पहिरो पन्छाएपछि सुरुमा एकतर्फी रूपमा सवारी चलाइएको थियो। पहिरो हटाउन सडक विभागले दुई दर्जनभन्दा बढी भारी उपकरण र जनशक्ति खटाएको थियो।

राजमार्ग बन्द हुँदा तराई र भारतबाट खाद्यान्नसहितका सामान बोकेर आएका ट्रक कलंकीदेखि बल्खुसम्म लाइनमा रोकिएका थिए। राजमार्ग खुलेसँगै काठमाडौंमा रोकिएका खाली ग्यास बुलेट पठाउन थालिएको छ। नेपाल आयल निगमका कार्यकारी निर्देशक नागेन्द्र साहका अनुसार नागढुंगा हुँदै बुलेट पठाउन सुरु गरिएको छ र राजधानीमा अड्किएका करिब ६० बुलेट बाहिर जानेछन्।

ग्यास भरेर बाहिर रोकिएका बुलेट पनि रहेको उनले बताएका छन्। यसैबीच सडक विभागको पछिल्लो विवरणअनुसार देशभर १४ प्रमुख सडक अझै प्रभावित छन्। नारायणगढ–मुग्लिन सडकको सिमलतालमा आधा सडक भासिएकाले एकतर्फी यातायात चलिरहेको छ।

बीपी राजमार्गका विभिन्न स्थानमा पहिरो र डाइभर्सन बगाउँदा सडक अवरुद्ध छ, तर थप क्षति नपुगे भोलि साँझसम्म यो सडक खुल्न सक्ने विभागले जनाएको छ। कान्ति राजमार्गमा ४ मध्ये ३ स्थानको पहिरो हटाइएको छ। कालीगण्डकी करिडोर पूर्ण रूपमा सुचारु हुन केही दिन लाग्ने विभागको अनुमान छ।