महाधिवेशनका क्रममा पार्टीविरोधी गतिविधिमा कारबाही गर्ने कांग्रेस अनुशासन समितिको चेतावनी

नेपाली कांग्रेसको केन्द्रीय अनुशासन समितिले पार्टीको १५औँ महाधिवेशनको निर्वाचन प्रक्रियामा सहभागी भइसकेपछि पनि पार्टीविरुद्ध काम गर्नेमाथि कारबाही गर्ने चेतावनी दिएको छ। पार्टीको १५औँ महाधिवेशनका लागि निर्वाचन प्रक्रिया अघि बढिरहेका बेला समितिले यो चेतावनी सार्वजनिक गरेको हो। समितिका कार्यवाहक संयोजक रमेश धमलाले अनुशासन उल्लङ्घन हुने अवाञ्छित क्रियाकलापबाट टाढा रहन सबैलाई आग्रह गर्नुभएको छ।

समितिको निर्देशन विभिन्न पदीय जिम्मेवारीमा रहेका पदाधिकारीदेखि निर्वाचित प्रतिनिधि र साधारण क्रियाशील सदस्यसम्म सबैमा समान रूपमा लागू हुने जनाइएको छ। कुनै पनि तहका नेता वा कार्यकर्ताले पार्टीको हितमा असर पर्ने काम गर्न नपाउने समितिको भनाइ छ। समितिले यस विषयमा पार्टीका सबै तहका नेता तथा कार्यकर्तालाई सचेत गराएको छ।

महाधिवेशनको निर्वाचनमा भाग लिइसकेका केही व्यक्ति कांग्रेसकै नाम प्रयोग गरेर पार्टीविरोधी गतिविधिमा लागेको जानकारी आफूले पाएको समितिले जनाएको छ। समितिले त्यस्ता क्रियाकलापलाई अत्यन्त गम्भीर रूपमा लिएको र तिनमाथि निरन्तर निगरानी राखिरहेको संयोजक धमलाले बताउनुभएको छ। पार्टीको मर्यादा र नीतिविपरीत कुनै काम नगर्न उहाँले आह्वान गर्नुभएको छ।

निर्देशन पालना नगर्नेमाथि समिति तत्कालै आवश्यक कडा कारबाहीको प्रक्रिया अघि बढाउन बाध्य हुने उहाँले स्पष्ट पार्नुभएको छ।