इरानले मध्यस्थमार्फत अमेरिकालाई वार्ताका सर्त पठायो, तनाव बढ्दो

इरानी संसद्का सभामुख मोहम्मद बाघेर गालिबाफले मध्यस्थकर्तामार्फत अमेरिकासमक्ष वार्ताका सर्त र सन्देश पठाइसकेको जनाउनुभएको छ। आइतबार संसद्लाई सम्बोधन गर्दै उहाँले युद्ध र कूटनीति एकअर्काका विकल्प नभएको धारणा राख्नुभयो। आवश्यकताअनुसार सैन्य शक्ति प्रयोग गर्ने र उपयुक्त बेला कूटनीतिक अभ्यासबाट आफ्नो हैसियत बलियो बनाउने इरानको नीति रहेको उहाँको भनाइ छ।

युद्धको चर्चा गर्ने तर त्यसको निष्कर्षबारे स्पष्ट बाटो नदेखाउने सोचले मुलुकलाई अन्तहीन द्वन्द्वतर्फ धकेल्न सक्ने उहाँले चेतावनी दिनुभयो। इरानका सर्त पूरा नभएसम्म अमेरिकासँग पहिलेकै अवस्थामा वार्ता र होर्मुज जलसन्धि खोल्ने विषय नउठ्ने उहाँले प्रस्ट पार्नुभएको छ। इरानको सर्वोच्च राष्ट्रिय सुरक्षा परिषद्का सचिव मोहसिन रेजाईले कतार र पाकिस्तानको मध्यस्थतामा सर्त पठाइएको र तेहरान अमेरिकी राष्ट्रपति डोनाल्ड ट्रम्पको जवाफ पर्खिरहेको बताउनुभएको थियो।

अल जजिराका अनुसार इरानले ७ बुँदे सर्त अघि सारेको छ, जसमा सबै मोर्चामा युद्ध अन्त्य, रोक्का गरिएको रकम फुकुवा र जलसैनिक नाकाबन्दी हटाउने विषय परेका छन्। यता अमेरिकाले इराक, कतार, साउदी अरब, लेबनान र कुवेतलगायत मध्यपूर्वका देशमा रहेका आफ्ना नागरिकलाई सतर्क रहन आग्रह गरेको छ। राष्ट्रपति ट्रम्प क्याम्प डेभिडको बसाइ छोट्याएर ह्वाइट हाउस फर्किनुभएको छ।