इरान युद्धमा अमेरिकी सेनाको खर्च ४३ अर्ब ६० करोड डलर पुग्यो

इरानसँग जारी युद्धमा अमेरिकी सेनाको खर्च बढेर ४३ अर्ब ६० करोड अमेरिकी डलर पुगेको छ। अमेरिकी सेन्ट्रल कमान्डले सांसदहरूलाई उपलब्ध गराएको पछिल्लो अनुमानअनुसार सेप्टेम्बर ३ सम्मको सैन्य खर्च यति पुगेको हो। यो रकम नेपाली मुद्रामा करिब ६६ खर्ब ७५ अर्ब रुपैयाँ बराबर हुन आउँछ।

अमेरिका र इजरायलले गत फेब्रुअरी २८ मा इरानविरुद्ध सैन्य कारबाही सुरु गरेयता युद्धको आर्थिक भार निरन्तर बढिरहेको छ। पछिल्लो अनुमानले केही सातामै सैन्य खर्च उल्लेखनीय रूपमा बढेको देखाएको छ। यसअघि अमेरिकी कङ्ग्रेसनल बजेट कार्यालयले अगस्ट १ सम्ममा ३८ अर्ब डलर खर्च भइसकेको अनुमान सार्वजनिक गरेको थियो।

युद्धको तीव्रता कायम रहेमा हरेक महिना झन्डै ३ अर्ब डलर वा त्योभन्दा बढी खर्च हुन सक्ने उक्त कार्यालयको आकलन छ। कुल खर्चमध्ये सबैभन्दा ठूलो हिस्सा हतियार तथा क्षेप्यास्त्रमा रहेको छ। हतियारको खर्च मात्रै २८ अर्ब १० करोड अमेरिकी डलर पुगेको पछिल्लो विवरणमा उल्लेख छ।