बाढीपीडितका लागि सहयोग जुट्ने क्रम जारी: उबर, तमु धीं र कलाकार सङ्घ

भोटेकोशी बाढीबाट प्रभावित नागरिकको राहत र पुनःस्थापनाका लागि स्वदेश तथा विदेशबाट सहयोग जुट्ने क्रम जारी छ। राइड सेयरिङ कम्पनी उबरले नेपाल रेडक्रस सोसाइटीमार्फत करिब ५० लाख रुपैयाँ सहयोग गर्ने घोषणा गरेको छ। उक्त रकम आपत्कालीन राहत सामग्री, अस्थायी आश्रय र प्रभावित परिवारको पुनःस्थापनामा खर्च हुने कम्पनीले जनाएको छ।

उबरले आफ्नो प्लेटफर्मबाट हुने प्रत्येक बाइक यात्राबाट करिब १० रुपैयाँ र कार यात्राबाट करिब २० रुपैयाँ प्रधानमन्त्री दैवी प्रकोप उद्धार कोषमा जम्मा गर्ने बताएको छ। राहत अभियानमा फ्लीट साझेदार ट्याक्सीमाण्डु पनि सहभागी हुनेछ। उबर इन्डिया तथा दक्षिण एसियाका अन्तर्राष्ट्रिय बजार प्रमुख आकांक्षा सिंहले प्रभावित समुदायको पुनःस्थापनाका लागि सामूहिक प्रयास आवश्यक रहेको बताउनुभएको छ।

बेलायतमा रहेको तमु धीं युकेले संकलन गरेको झन्डै एक करोड ११ लाख रुपैयाँको चेक अध्यक्ष जुमकाजी गुरुङ नेतृत्वको टोलीले मंगलबार कार्यवाहक प्रधानमन्त्रीसमेत रहेका अर्थमन्त्री डा. स्वर्णिम वाग्लेलाई हस्तान्तरण गरेको छ। उक्त रकम प्रधानमन्त्री दैवी प्रकोप राहत कोषमा जम्मा भएको छ भने संस्थाले करिब २५ लाख रुपैयाँ बराबरको राहत सामग्री वितरणको तयारी गरेको जनाएको छ।

नेपाल फिल्म सोसाइटी र नेपाल चलचित्र कलाकार सङ्घ अमेरिका शाखाले जुटाएको झन्डै चार लाख ८३ हजार रुपैयाँ सूचना तथा सञ्चारमन्त्री डा. विक्रम तिमिल्सिनालाई बुझाइएको छ। मन्त्री तिमिल्सिनाले विपद्को समयमा चलचित्र क्षेत्रबाट भएको सहयोगप्रति धन्यवाद व्यक्त गरेका छन्।