एमालेसँग तत्काल एकताको हल्ला निराधार: वर्षमान पुन

नेपाली कम्युनिस्ट पार्टी (नेकपा) का नेता वर्षमान पुनले एमालेसँग तत्काल पार्टी एकता हुने र पद बाँडफाँट गरिने हल्लामा सत्यता नरहेको बताउनुभएको छ। काभ्रेको बनेपामा शनिबार नेकपा खानीखोला सम्पर्क समितिले आयोजना गरेको भेलालाई सम्बोधन गर्दै उहाँले भविष्यमा पार्टी एकता गर्ने विषयमा नेतृत्व तहमा कुराकानी भइरहेको जानकारी दिनुभयो। एमालेभित्रको आन्तरिक बहस नटुंगिँदासम्म तत्काल पार्टी एकताको अवस्था नरहेको उहाँको भनाइ छ।

एमालेसँग प्रदेश सरकारमा सहकार्य भइसकेको उल्लेख गर्दै संविधान र लोकतन्त्रको रक्षा तथा वैदेशिक हस्तक्षेपको प्रतिवादका लागि वाम शक्तिबीच र आवश्यक परे नेपाली कांग्रेससँग समेत सहकार्य जारी रहने उहाँले बताउनुभयो। नेकपालाई सम्मेलन वा महाधिवेशनमार्फत पुनर्गठन तथा सुदृढ गर्दै एजेन्डा मिल्ने अन्य वाम घटकसँग एकताको प्रक्रिया अघि बढाउने उहाँले स्पष्ट पार्नुभयो। संविधान निर्माणमा भूमिका नरहेका शक्ति सरकारमा रहेको भन्दै सत्तारुढ दल रास्वपाको संविधानबारे स्पष्ट धारणा आउनुपर्ने उहाँको माग छ।

सरकारको कार्यशैली, राजदूत नियुक्ति प्रक्रिया र विपद् व्यवस्थापनप्रति उहाँले असन्तुष्टि जनाउनुभयो। नयाँ भनिएका दलहरूले पुराना राजनीतिक शक्तिका कमजोरी सच्याउनुको साटो ‘वासिङ मेसिन’को भूमिका खेलेको आरोप लगाउँदै नेताहरूले कमजोरी स्वीकार गरेर गुमेको जनविश्वास फर्काउनुपर्नेमा उहाँले जोड दिनुभयो।