कांग्रेस देउवा समूह: मंसिर २१–२३ मा महाधिवेशन, सरकारको कार्यशैलीमाथि असन्तुष्टि

नेपाली कांग्रेसको देउवा समूहले आगामी मंसिर २१ देखि २३ गतेसम्म काठमाडौंमा १५औँ महाधिवेशन गर्ने जनाएको छ। समूहका नेता डा. प्रकाशशरण महतले मंगलबार चुनदेवीस्थित सम्पर्क कार्यालयमा पत्रकार सम्मेलन गरी महाधिवेशनको तयारी तीव्र रूपमा भइरहेको बताउनुभएको छ।

डा. महतका अनुसार २६ जिल्लामा नयाँ नेतृत्व चयन भइसकेको छ भने चार जिल्लामा अधिवेशन उद्घाटन भएको छ। ६१८ पालिका, २२८ प्रदेशसभा र ११४ प्रतिनिधिसभा निर्वाचन क्षेत्रमा क्षेत्रीय अधिवेशन सकिएको उहाँले जानकारी दिनुभएको छ।

आफूहरू पार्टीको विधि र विधानअनुसार नै महाधिवेशन गर्ने उहाँको भनाइ छ। यो महाधिवेशनले कांग्रेसको मूल मान्यता, विचार र पार्टी सञ्चालन पद्धतिको रक्षा गर्ने अठोट लिएको महतले बताउनुभएको छ। आधिकारिकताको दाबी गर्ने गगन पक्ष वैचारिक र वैधानिक दुवै हिसाबले सही ठाउँमा नरहेको उहाँको आरोप छ।

त्यस पक्षसँग कांग्रेसको आत्मा नै बाँकी नरहेको पनि महतले टिप्पणी गर्नुभएको छ। पत्रकार सम्मेलनमा डा. महतले राष्ट्रिय स्वतन्त्र पार्टी नेतृत्वको सरकारले जनअपेक्षाअनुसार काम गर्न नसकेको आरोप लगाउनुभएको छ।

प्रशासन र संवैधानिक निकायको सञ्चालनमा विधि र प्रक्रिया पालना नभएको उहाँले बताउनुभएको छ। सरकारले निर्वाचनका बेला गरेका प्रतिबद्धता पूरा नगरेको पनि उहाँको आरोप छ। बिनाआधार पत्रकार र सञ्चारमाध्यममाथि धरपकड गर्नु लोकतान्त्रिक मूल्यविपरीत भएको भन्दै उहाँले प्रेस स्वतन्त्रता सुनिश्चित गर्न सरकारसँग आग्रह गर्नुभएको छ।