कोशी प्रदेशमा नेपालीसहित १४ भाषा सरकारी कामकाजमा प्रयोग हुने, विधेयक सर्वसम्मत पारित

कोशी प्रदेशसभाले ‘कोशी प्रदेशमा सरकारी कामकाजको भाषा सम्बन्धमा व्यवस्था गर्न बनेको विधेयक’ सर्वसम्मत रूपमा पारित गरेको छ। विधेयकले प्रदेशभित्र नेपालीसहित १४ वटा भाषालाई सरकारी कामकाजको भाषा बनाउने व्यवस्था गरेको छ।

विधेयकअनुसार नेपाली भाषाका अतिरिक्त स्थान र समुदायको बाहुल्यताका आधारमा मैथिली र लिम्बूसहित १३ भाषाले मान्यता पाउनेछन्। प्रदेश राजपत्रमा प्रकाशित भएपछि लिम्बू र मैथिलीसँगै अन्य ११ वटा मातृभाषाले सरकारी कामकाजको भाषाका रूपमा कानुनी मान्यता पाउनेछन्।

रातोपाटीका अनुसार यायोख्खाको दबाबपछि विधेयक पारित हुने क्रममा सच्याइएको थियो। अनलाइनखबरका अनुसार आन्दोलनपछि बैठक रोकेर सहमति गरिएको थियो र सांसदलाई विधेयक पढ्न नदिई पारित गरिएको थियो।

यसैबीच प्रदेश प्रमुख परशुराम खापुङले प्रदेश मन्त्रिपरिषद्को सिफारिसमा कोशी प्रदेशसभाको नवौँ अधिवेशन अन्त्य गरेका छन्।