एसियाली खेलकुद क्रिकेटमा वर्षा, नेपाल–श्रीलंका क्वार्टरफाइनलमा चिन्ता

जापानमा चलिरहेको एशियाली खेलकुदअन्तर्गत पुरुष क्रिकेटको क्वार्टरफाइनलमा नेपाल र श्रीलङ्काबीचको खेलमा वर्षाको जोखिम देखिएको छ। तालिकाअनुसार यो खेल भोलि बिहान पौने ६ बजे करोगी स्पोर्ट्स पार्कमा सुरु हुनेछ। वर्षाका कारण खेल हुन नसके आईसीसी वरीयताका आधारमा श्रीलङ्का सेमिफाइनलमा पुग्नेछ र नेपाल प्रतियोगिताबाट बाहिरिनेछ।

नेपालले यो खेल जितेमा इतिहास रच्दै सेमिफाइनलमा पुग्नेछ। यसअघिका पहिलो र दोस्रो क्वार्टरफाइनल वर्षाका कारण टससमेत नभई रद्द भएका छन्। पाकिस्तान–हङकङ र भारत–अफगानिस्तानबीचका ती खेल रद्द भएपछि भारत र पाकिस्तान वरीयताका आधारमा अन्तिम चारमा पुगेका छन्।

नेपाल समूह ‘ए’ को विजेता बनेर क्वार्टरफाइनलमा पुगेको हो र समूह चरणमा उसले अफगानिस्तानलाई पराजित गरेको थियो। एशियाली खेलकुदमा नेपाल र श्रीलङ्का १६ वर्षपछि आमनेसामने हुन लागेका हुन्। सन् २०१० को प्रतियोगिताको क्वार्टरफाइनलमा नेपाल श्रीलङ्कासँग २ विकेटले पराजित भएको थियो।

सन् २०२४ को टी–ट्वान्टी विश्वकपमा दुई टोलीबीच तय भएको खेल पनि वर्षाका कारण टस नै नभई रद्द भएको थियो। प्रतियोगिताको चौथो क्वार्टरफाइनलमा भोलि बिहान सवा १० बजे बङ्गलादेश र मलेशिया खेल्ने तालिका छ।