देउवा पक्षको छुट्टै महाधिवेशन तयारी, नयाँ वेबसाइट र प्रतिनिधि चयनको मापदण्ड

नेपाली कांग्रेसका निवर्तमान सभापति शेरबहादुर देउवा पक्षले गगन थापा नेतृत्वको संस्थापन पक्षभन्दा छुट्टै १५औँ महाधिवेशनको तयारी तीव्र बनाएको छ। पूर्वमहामन्त्री शशांक कोइराला संयोजक रहेको महाधिवेशन तयारी समितिका अनुसार असोज १५ गते वडा अधिवेशन हुनेछ र मंसिर २१ देखि २३ गतेसम्म केन्द्रीय महाधिवेशन गरिनेछ। थापा पक्षले भने असोज ३ र ४ मा वडा अधिवेशन गरिसकेको छ, जसमा देउवा पक्षका नेता र कार्यकर्ता सहभागी भएका थिएनन्।

देउवा पक्षले 'एनसी १५ जनरल कन्भेन्सन डटकम' नामको छुट्टै वेबसाइट पनि सुरु गरेको छ, जसमार्फत सदस्यताका लागि आवेदन दिन सकिन्छ। क्रियाशील सदस्यता व्यवस्थापन समितिका संयोजक किरणराज शर्मा पौडेलले असोज ९ गतेसम्मको सदस्यता विवरण निर्वाचन समितिका संयोजक एकराज पोखरेललाई बुझाउनुभएको छ। पौडेलका अनुसार कुल क्रियाशील सदस्य करिब ७ लाख ८४ हजार छन्।

नयाँ मापदण्डअनुसार प्रत्येक वडाबाट कम्तीमा २१ र बढीमा ७५ जना क्षेत्रीय प्रतिनिधि चुनिनेछन्। १५० जनासम्म क्रियाशील सदस्य भएका वडाले २१ जना र ६५१ भन्दा बढी सदस्य भएका वडाले ७५ जना प्रतिनिधि पाउनेछन्। महिला, युवा, अपाङ्गता भएका व्यक्ति, द्वन्द्वपीडित र सहिद परिवारलगायतका लागि समूहगत प्रतिनिधित्व छुट्याइएको छ।

हरेक वडाबाट ४० वर्षमुनिका कम्तीमा एक महिला र एक पुरुष युवा प्रतिनिधि अनिवार्य गरिएको छ।