कांग्रेसको क्षेत्रीय अधिवेशन १३ जिल्लामा, काठमाडौं–३ मा प्रक्रियामै अन्योल

नेपाली कांग्रेसको १५औँ महाधिवेशनअन्तर्गत संघीय र प्रदेश निर्वाचन क्षेत्रस्तरका अधिवेशन जिल्लाअनुसार फरक-फरक दिनमा हुँदैछन्। अत्यधिक वर्षाका कारण असोज १० गतेका लागि तोकिएका अधिवेशन जिल्लाको अनुकूलतामा असोज १३ गतेभित्र सक्न केन्द्रीय निर्वाचन समितिले विकल्प दिएको थियो। समितिका अनुसार आइतबार झापा, मोरङ, काठमाडौं, म्याग्दी, बागलुङ, अर्घाखाँची, प्युठान, बाँके, डोल्पा, मुगु, हुम्ला, कालिकोट र सुर्खेत गरी १३ जिल्लामा अधिवेशन भएको छ।

सोमबार असोज १२ गते ताप्लेजुङ, पाँचथर, सोलुखुम्बु, दोलखा, धादिङ र काभ्रेलगायत २९ जिल्लामा र मंगलबार ९ जिल्लामा अधिवेशन हुनेछ। काठमाडौं–३ मा भने आइतबार दिउँसो १ बजेका लागि तय गरिएको उद्घाटन समयमा सुरु हुन सकेको थिएन। क्षेत्रीय नेतृत्वमा आकांक्षीबीच सहमति नजुट्दा प्रक्रिया कसरी अघि बढ्ने भन्नेमै अन्योल देखिएको छ।

केही युवाले विभिन्न पदमा उम्मेदवारी घोषणा गरेपछि त्यहाँ प्रतिस्पर्धा थप कडा बनेको छ। क्षेत्रीय सभापतिका उम्मेदवार युवा नेता शिव श्रेष्ठले निर्वाचनको हारजित स्वीकार्ने तर सहमतिका नाममा बन्द कोठामा हुने मिलेमतो नमान्ने बताउनुभएको छ। पर्सा क्षेत्र नं.

४ मा भने क्षेत्रीय पदाधिकारी र महाधिवेशन प्रतिनिधि सर्वसम्मत रूपमा चयन भएका छन्। यसैबीच, केन्द्रीय महाधिवेशनमा महामन्त्री पदका लागि आधा दर्जन आकांक्षीले उम्मेदवारी घोषणा गरेका छन्।