संघीयता कार्यान्वयनमा तीन तहबीचको समन्वय सुध्रिएन: मन्त्री प्रजापति

बागमती प्रदेशका उद्योग, पर्यटन, श्रम तथा यातायातमन्त्री राजेन्द्र प्रजापतिले संघीयता लागू भएको ९ वर्ष पुग्न लाग्दा पनि संघ, प्रदेश र स्थानीय तहबीचको कार्यशैली र तालमेलमा अपेक्षित सुधार नआएको बताउनुभएको छ। विश्व पर्यटन दिवसका अवसरमा आइतबार काठमाडौंमा भएको कार्यक्रममा उहाँले यस्तो धारणा राख्नुभएको हो। मन्त्री प्रजापतिका अनुसार उद्योग, पर्यटन र यातायात क्षेत्रमा तीनै तहका सरकारबीच द्वन्द्वजस्तै स्थिति देखिएको छ।

समन्वयको कमीले सेवा प्रवाह र पूर्वाधार निर्माणमा असर परेको उहाँको भनाइ छ। संघीय प्रणालीमा तहहरूबीच तालमेल नहुँदा राज्य सञ्चालन नै कठिन हुने भन्दै उहाँले जिम्मेवार पदाधिकारीहरू गम्भीर हुनुपर्नेमा जोड दिनुभयो। बागमतीको यातायात क्षेत्र व्यवस्थित बनाउन प्रदेश सरकार सक्रिय रहेको पनि उहाँले उल्लेख गर्नुभयो।