कालीगण्डकीको बाढीले मिर्मी पुल बगायो

कालीगण्डकी नदीमा आएको बाढीले स्याङ्जा र गुल्मी जोड्ने मिर्मीको पक्की पुल बगाएको छ। मिर्मी ड्याम साइटभन्दा तल रहेको यो पुलले गुल्मीको कालीगण्डकी गाउँपालिका–१ हर्मीचौर र स्याङ्जाको कालीगण्डकी गाउँपालिका–७ मिर्मीलाई जोड्थ्यो। पुल बगेपछि दुई जिल्लाबीच सडक सम्पर्क टुटेको छ।

नदीको बहाव अत्यधिक बढेपछि कालीगण्डकी ए जलविद्युत् आयोजनाले बिजुली उत्पादन रोकेको छ। पर्वतको वारीबेनी, फर्से र सेतीबेनी बजारका दर्जनौँ घर बाढीबाट प्रभावित छन्; सेतीबेनी बजार डुबानमा छ। जलजलाका वडाध्यक्ष हिरविकास जिसीका अनुसार फर्से क्षेत्रमा करिब दुई दर्जन घर बगेका छन्।

पर्वतका तीन बस्ती विस्थापित भएका छन्। पश्चिमी भेगमा आज दिनभर झरी पर्ने पूर्वानुमान छ।