टरिगाउँ विमानस्थलमा दुई वर्षभित्र १४ सय मिटर धावनमार्ग

सरकारले दाङको टरिगाउँ विमानस्थलको धावनमार्ग दुई वर्षभित्र कम्तीमा १४ सय मिटर पुर्‍याउने तयारी गरेको छ। संस्कृति, पर्यटन तथा नागरिक उड्डयनमन्त्री खड्गराज पौडेलले बुधबार तुलसीपुर उपमहानगरपालिका–१२ स्थित विमानस्थलको स्थलगत निरीक्षणपछि यस्तो बताउनुभएको छ। निरीक्षण टोलीमा मन्त्रालयका सचिव, नेपाल नागरिक उड्डयन प्राधिकरणका महानिर्देशक मुकेश डंगोल र प्राविधिकहरू पनि हुनुहुन्थ्यो।

मन्त्री पौडेलका अनुसार चालु आर्थिक वर्षमा विमानस्थलका लागि २५ करोड रुपैयाँ विनियोजन भएको छ र यसैबाट यही वर्ष प्रारम्भिक अध्ययन तथा पुर्ने काम सुरु गरिनेछ। सरकारले यहाँ ७२ सिटे विमान नियमित उडान गर्न सक्ने गरी विमानस्थल विकास गर्ने लक्ष्य राखेको छ। धावनमार्गलाई मोड्नुपर्ने भनिए पनि निरीक्षणमा सिधै करिब ६ सय मिटर विस्तार गर्न सकिने प्रारम्भिक सम्भावना देखिएको मन्त्री पौडेलले जानकारी दिनुभएको छ।

कुहिरो वा अन्य कारणले नेपालगन्जमा विमान अवतरण हुन नसक्दा टरिगाउँलाई वैकल्पिक विमानस्थलका रूपमा प्रयोग गर्ने योजना छ। नेपालगन्जभन्दा उचाइमा रहेकाले यो विमानस्थल वैकल्पिक प्रयोगका लागि उपयुक्त हुने मन्त्रीको भनाइ छ। निरीक्षणका क्रममा मन्त्री पौडेलले ‘महामन्त्रीज्यूको जिल्लाको विमानस्थल नबनी हुन्छ?’ भन्दै आयोजना नरोकिने बताउनुभएको छ।

रास्वपाका महामन्त्री विपिन आचार्यले विस्तारको पहल कुनै व्यक्तिविशेषका लागि नभई दाङसहित आसपासका जिल्लाका करिब १७ देखि १८ लाख जनसङ्ख्याको फाइदाका लागि भएको बताउनुभएको छ। विमानस्थल विस्तारसम्बन्धी निर्णय प्राविधिक अध्ययनका आधारमा गरिने उहाँको भनाइ छ।