महाधिवेशन सारेर संवाद थाल्न खड्काको आग्रह

नेपाली कांग्रेसका निवर्तमान कार्यवाहक सभापति पूर्णबहादुर खड्काले सभापति गगन थापालाई १५औँ महाधिवेशनको कार्यतालिका केही समय स्थगित गरी वार्ता थाल्न आग्रह गर्नुभएको छ। बिहीबार सामाजिक सञ्जालमार्फत धारणा सार्वजनिक गर्दै उहाँले असोज ३ गतेदेखि सुरु हुने घोषित कार्यतालिका केही समयका लागि सार्न सुझाव दिनुभएको हो। दोस्रो सुझावमा उहाँले १४औँ महाधिवेशनबाट निर्वाचित सभापति शेरबहादुर देउवा र अग्रज नेताहरूसँग थापा आफ्नै अग्रसरतामा तत्काल वार्ता र संवाद प्रारम्भ गर्नुपर्ने उल्लेख गर्नुभएको छ।

पार्टीको सम्पूर्ण एकता अझै सम्भव रहेको विश्वास व्यक्त गर्दै उहाँले थापालाई गम्भीर आत्मसमीक्षा गर्न पनि आग्रह गर्नुभएको छ। वैशाख २१ गते दुई नेताबीच भएको संवादपछि त्यही महिनामा यस्तो निर्णय भएको भए जेठको पहिलो साताभित्रै सिंगो कांग्रेस सानेपास्थित केन्द्रीय कार्यालयमा एकताबद्ध हुने खड्काको भनाइ छ। अलग–अलग दुई अधिवेशनको प्रक्रिया नरोकिए कांग्रेसको विभाजन रोक्न कसैले नसक्ने चेतावनी पनि उहाँले दिनुभएको छ।

कांग्रेसमा विभाजनको अवस्था आए संविधान निर्माणमा महत्त्वपूर्ण भूमिका खेलेका अन्य राजनीतिक दलमा समेत त्यसको प्रभाव पर्न सक्ने उहाँको भनाइ छ। संवादबाटै कांग्रेसलाई एकताबद्ध बनाउन सकिने उहाँले उल्लेख गर्नुभएको छ।