महाधिवेशन उद्घाटन गर्न देउवालाई सभापति थापाको निम्तो

नेपाली कांग्रेसका सभापति गगनकुमार थापाले पूर्वसभापति शेरबहादुर देउवालाई पार्टीको १५औँ महाधिवेशन उद्घाटन गरिदिन आग्रह गर्नुभएको छ। ललितपुरको सानेपास्थित केन्द्रीय कार्यालयमा बिहीबार बसेको केन्द्रीय कार्यसमिति बैठकलाई सम्बोधन गर्दै उहाँले यस्तो आग्रह गर्नुभएको हो। पूर्वसभापति आएर उद्घाटन गरिदिनु पार्टीका लागि ठूलो सम्मानको विषय हुने थापाले बताउनुभएको छ।

पार्टी विधानअनुसार महाधिवेशनबाटै नयाँ सभापति चयन हुने भएकाले देउवाको सम्मानपूर्वक बिदाइको समय यही रहेको उहाँको भनाइ छ। महाधिवेशन असोज १६ गते खुलामञ्चबाट प्रारम्भ हुने र त्यसअघि असोज ३ र ४ गते वडा अधिवेशन हुने कार्यतालिका छ। महाधिवेशन व्यवस्थापन समिति आफ्नै संयोजकत्वमा बनाउने निर्णय भएको जानकारी दिँदै थापाले व्यवस्थापनको काममा सघाउन केन्द्रीय सदस्यहरूलाई आग्रह गर्नुभयो।

नेता पूर्णबहादुर खड्काले राख्नुभएको ८ बुँदे र शेखर कोइरालाले राख्नुभएको ५ बुँदे माग सम्बोधन भइसकेकाले अब छुट्टै महाधिवेशनको औचित्य नरहेको उहाँले स्पष्ट पार्नुभयो। पार्टी एकताका लागि जुनसुकै लचकता अपनाउन तयार रहेको र महाधिवेशन उद्घाटनको दिनसम्मै देउवालाई सहभागी गराउन प्रयास गरिरहने उहाँले बताउनुभएको छ। पार्टीका विभिन्न तहमा देखिएका मतभिन्नता थाती राखेर बृहत्तर हितका लागि लचकता अपनाउन उहाँले सबै पक्षलाई आग्रह गर्नुभएको छ।