गल्छी–रसुवागढी सडक पुनर्निर्माणमा बेलायतको सहयोग, बेलिब्रिजसमेत उपलब्ध गराउने

भोटेकोशी बाढीले क्षति पुर्‍याएको गल्छी–रसुवागढी सडकखण्ड पुनर्निर्माणका लागि बेलायत सरकारले बेलिब्रिजसहित प्राविधिक र आर्थिक सहयोग गर्ने भएको छ। पूर्वाधार विकासमन्त्री सुनिल लम्सालसँग सोमबार मन्त्रालयमा बेलायती दूतावासका वरिष्ठ विकास काउन्सिलर एलेक्स ल्युको नेतृत्वमा आएको टोलीले भेटेर बाढीपछिको पुनर्स्थापनाबारे छलफल गरेको छ। बेलायतले दिने बेलिब्रिज उक्त सडकखण्डमा आवतजावत फेरि सुचारु गर्न प्रयोग हुने मन्त्रालयले जनाएको छ।

दिगो वित्तीय व्यवस्थापन, डिजिटल रूपान्तरण र विपद् उत्थानशील विकासमा पनि बेलायतले सघाउने प्रतिबद्धता काउन्सिलर ल्युले व्यक्त गर्नुभएको छ। यता, सडक विभागले उद्धार र राहतलाई गति दिन अहिलेकै सडक रेखाबाट आवागमन फेरि जोड्ने कामलाई प्राथमिकता दिएको छ। सरकारले बेत्रावतीसम्मको सडक फेरि चलाउने र त्यहाँ बेलिब्रिज राख्ने तयारी गरेको छ।

स्थायी संरचना भने 'बिल्ड ब्याक बेटर' अवधारणाअनुसार स्तरीय बनाइने विभागका महानिर्देशक डा. विजय जैसीले बताउनुभएको छ। भोटेकोशी र त्रिशूलीको बाढीले पृथ्वी राजमार्ग र गल्छी–रसुवागढी सडकमा ठूलो क्षति पुर्‍याएको भन्दै विभागले पुनर्निर्माणका लागि करिब ५० अर्ब रुपैयाँ माग गरेको छ।

मन्त्री लम्सालका अनुसार अब बन्ने सडक र पुल बाढीको प्रभाव क्षेत्रभन्दा बाहिर र अग्लो स्थानमा पर्ने गरी डिजाइन गरिनेछ।