आचारसंहिता विपरीत कांग्रेस महाधिवेशनस्थलमा प्रचार सामग्री

नेपाली कांग्रेसको १५औँ महाधिवेशनस्थल परिसरमा आचारसंहिता विपरीत प्रचार सामग्री व्यापक रूपमा देखिएका छन्। पार्टीको निर्वाचन समितिले महाधिवेशनस्थल र वरपरका क्षेत्रमा फ्लेक्स, ब्यानर, पोस्टर, पम्प्लेटलगायत छापिएका सबै किसिमका प्रचार सामग्री राख्न, टाँस्न र बाँड्न पूर्ण प्रतिबन्ध लगाएको थियो। हालैका विपद्लाई ध्यानमा राख्दै महाधिवेशनलाई मर्यादित, मितव्ययी र अनुशासित बनाउन यो रोक लगाइएको समितिले जनाएको थियो।

समितिका सदस्य-सचिव राजु कटुवालले सबै खाले तडकभडकपूर्ण प्रचार पूर्ण रूपमा निषेध हुने बताउनुभएको थियो। पार्टी सभापति गगन थापाले पनि उम्मेदवार र प्रतिनिधिलाई प्रचार सामग्री नटाँस्न निर्देशन दिनुभएको थियो। तर परिसरका पोल र भुइँभरि पोस्टर तथा पर्चा छरिएका छन्।

बिहीबार नयाँ केन्द्रीय कार्यसमिति चयनका लागि मतदान भइरहेको छ, जसमा सभापति, उपसभापति, महामन्त्री, सहमहामन्त्री र केन्द्रीय सदस्य पदमा सयौँ उम्मेदवार प्रतिस्पर्धामा छन्।