पहाड–हिमालमा बदली, तराईमा बिहान हुस्सु; भोलि मधेसमा मध्यम वर्षाको सम्भावना

देशका पहाडी र हिमाली भू-भागमा आज बदली रहने र तराईमा बिहानपख हुस्सु लाग्ने जल तथा मौसम विज्ञान विभागले जनाएको छ। विभागका अनुसार अहिले देशभर मनसुनी वायुसँगै पश्चिमी वायुको आंशिक प्रभाव छ। आज कोशी, बागमती र गण्डकी प्रदेशका पहाडी र हिमाली क्षेत्रमा सामान्यतया बदली हुनेछ भने लुम्बिनी, कर्णाली र सुदूरपश्चिममा आंशिक बदली रहनेछ।

कोशीका पहाड र हिमाल तथा बागमती र गण्डकीका पहाडी भागका एक-दुई ठाउँमा हल्का वर्षा वा हिमपात हुन सक्ने विभागले उल्लेख गरेको छ। भोलि मधेश प्रदेश तथा कोशी र बागमतीको तराईका एक-दुई स्थानमा मध्यमसम्म वर्षा हुन सक्ने पूर्वानुमान छ। भोलि नै कोशी, बागमती, गण्डकी र लुम्बिनीका पहाडी र हिमाली भागका थोरै स्थानमा मध्यमसम्मको वर्षा वा हिमपात हुन सक्ने विभागले जनाएको छ।

कर्णाली र सुदूरपश्चिमका पहाडी र हिमाली भागका एक-दुई ठाउँमा भने भोलि हल्का वर्षा वा हिमपात हुन सक्छ। प्रमुख सहरमध्ये जनकपुरमा २५ डिग्री सेल्सियस, विराटनगर र नेपालगञ्जमा २३ डिग्री तथा पोखरामा २२ डिग्री सेल्सियस तापक्रम रहने अनुमान छ। काठमाडौँमा १९ र वीरेन्द्रनगरमा २० डिग्री सेल्सियस तापक्रम रहने विभागको अनुमान छ।

यी छवटै सहरमा वर्षाको सम्भावना शून्य प्रतिशत देखाइएको छ। विराटनगर, जनकपुर र नेपालगञ्जमा बिहान हुस्सु लाग्ने विभागले जनाएको छ।