चोलेन्द्रशमशेर जबरालाई भेट्न प्रहरीले रोकेपछि मानव अधिकार आयोगको आपत्ति

पूर्वप्रधानन्यायाधीश चोलेन्द्रशमशेर जबरालाई भेट्न आफ्नो टोलीलाई प्रहरीले रोकेकोमा राष्ट्रिय मानव अधिकार आयोगले आपत्ति जनाएको छ।

प्रहरी नियन्त्रणमा रहेका जबराको अवस्थाबारे जानकारी लिन आयोगको टोली आइतबार बिहान टेकुस्थित प्रहरी परिसर पुगेको थियो। तर प्रहरीले टोलीलाई जबरासँग भेट्न नदिएको आयोगले जनाएको छ।

आयोगले आइतबार जारी गरेको विज्ञप्तिमा भनिएको छ, 'संवैधानिक तथा कानूनी अधिकार विपरीत नेपाल प्रहरीबाट गरिएको यस प्रकारको व्यवहारप्रति आयोग खेद प्रकट गर्दछ।' आयोगले आफूलाई प्राप्त संवैधानिक तथा कानुनी अधिकारको सम्मान गर्न पनि आग्रह गरेको छ।

आयोगले भेटघाट र अनुगमनमा अवरोध पुर्‍याउने प्रहरीलाई कारबाही गर्न निर्देशन दिएको छ।