इरानबारे ट्रम्पको नयाँ चेतावनी, इरानी सेनाको आक्रमण तयारीको दाबी

अमेरिकी राष्ट्रपति डोनाल्ड ट्रम्पले इरानसँगको द्वन्द्वमा निकट भविष्यमा ठूला घटना हुने सङ्केत गर्दै आफू नै निर्णयकर्ता रहेको बताएका छन्। फक्स न्युजसँगको अन्तर्वार्तामा उनले इरानलाई पूर्ण रूपमा ध्वस्त पार्ने, आर्थिक रूपमा कमजोर हुँदै जान दिने वा सम्झौता गर्ने विकल्प आफूसामु रहेको उल्लेख गरेका छन्। इरानले आफूलाई सम्हाल्नुपर्ने उनको भनाइ छ।

संयुक्त राष्ट्रसङ्घको महासभाका क्रममा यसै साता इरानी राष्ट्रपति मसुद पेजेस्कियानसँग भेट्न आफू खुला रहेको समेत ट्रम्पले बताएका छन्। उनका अनुसार अमेरिकाले हुथी समूहसँग निरन्तर सम्पर्क गरिरहेको छ र उनीहरूले अमेरिकाविरुद्ध नलड्ने सहमति जनाएका छन्। उता इरानले युद्ध पुनः सुरु भएमा अमेरिकी पानीजहाजमाथि प्रहार गरिने चेतावनी दिँदै हाइपरसोनिक क्षेप्यास्त्रको गति म्याक १० पुर्‍याएको दाबी गरेको छ।

इरानी सेनाको खातम अल–अन्बिया केन्द्रीय मुख्यालयले एउटा युरोपेली देशमा भएको संयुक्त बैठकबाट केही क्षेत्रीय देशको सहमतिमा अमेरिकाले इरानविरुद्धका कारबाही पुनः सुरु गर्ने निर्णय गरेको दाबी गरेको छ। उक्त बैठकमा सहभागी देश वा आयोजक मुलुकबारे थप विवरण भने सार्वजनिक भएको छैन। अमेरिकी आक्रमणमा सहयोग गर्ने क्षेत्रीय मुलुकलाई पनि साझेदार मानिने चेतावनी विज्ञप्तिमा उल्लेख छ।