कोरला सडक अवरुद्ध, भन्सारमा १५० भन्दा बढी कन्टेनर र करिब २०० गाडी रोकिए

भारी वर्षाका कारण राष्ट्रिय गौरवको बेनी–जोमसोम–कोरला सडक ठाउँठाउँमा अवरुद्ध भएको छ। यसले गर्दा चीनबाट पैठारी गरिएका मालसामानसहितका कन्टेनर मुस्ताङको कोरला नाकामा रोकिएका छन्।

लोमान्थाङ गाउँपालिकास्थित कोरला नाकाको भन्सारमा १५० भन्दा बढी कन्टेनर रोकिएका छन्। बाढीपहिरोले सडक क्षतविक्षत बनाएपछि दसैं–तिहार लक्षित सामान बोकेका कन्टेनरसँगै करिब २०० विद्युतीय सवारी साधन (ईभी) पनि बाटोमै रोकिएका छन्।

तातोपानी र रसुवागढी नाका पूर्ण रूपमा बन्द भएपछि कोरला नाका एक मात्र वैकल्पिक मार्ग बनेको थियो। वर्षाका कारण अहिले यो नाका पनि प्रभावित भएको छ।

सडक नखुलेसम्म चाडपर्व लक्षित सामान बोकेका कन्टेनर र सवारी साधन अघि बढ्न सकेका छैनन्।