अस्पताल र स्वास्थ्य संस्थालाई तयारी अवस्थामा रहन निर्देशन

देशका विभिन्न भागमा भारीदेखि अति भारी वर्षाको पूर्वानुमान भएपछि स्वास्थ्य तथा खाद्य स्वच्छता मन्त्रालयले देशभरका अस्पताल र स्वास्थ्य संस्थालाई तयारी अवस्थामा रहन निर्देशन दिएको छ। मन्त्रालयअन्तर्गतको स्वास्थ्य आपतकालीन तथा विपद् व्यवस्थापन एकाइले बुधबार विज्ञप्ति जारी गरी सतर्कता अपनाउन आग्रह गरेको हो। एकाइका प्रमुख डा.

हेमन्त चन्द्र ओझाद्वारा जारी सूचनाअनुसार जल तथा मौसम विज्ञान विभाग र विपद् जोखिम न्यूनीकरण तथा व्यवस्थापन प्राधिकरणले असोज ९ गतेदेखि ११ गतेसम्म विभिन्न स्थानमा भारी वर्षा हुने अनुमान गरेका छन्। विभागको पछिल्लो पूर्वानुमानअनुसार कोशी र बागमती प्रदेशको पहाडी भू-भागका एक-दुई स्थानमा धेरै भारी वर्षा हुन सक्ने उल्लेख छ। लगातारको वर्षाले बाढी र पहिरोजस्ता प्रकोप निम्तिन सक्ने भन्दै मन्त्रालयले सबै स्वास्थ्य संस्थालाई आवश्यक जनशक्ति, औषधि र स्वास्थ्य सामग्री तयारी हालतमा राख्न भनेको छ।

आकस्मिक सेवाको निरन्तरता सुनिश्चित गर्न र सेवा प्रवाहमा अवरोध हुन नदिन व्यवस्थापन गर्न पनि निर्देशन दिइएको छ। बिरामी स्थानान्तरण तथा रेफरल सेवा सहज बनाउन एम्बुलेन्स सेवाको समन्वय प्रभावकारी बनाउन मन्त्रालयले आग्रह गरेको छ। आवश्यक परे संघीय तथा प्रदेशस्तरका स्वास्थ्य आपतकालीन कार्यसञ्चालन केन्द्रसँग समन्वय गर्न भनिएको छ।

हाल देशका विभिन्न स्थानमा वर्षा भइरहेकाले सम्भावित जोखिमप्रति सतर्क रहन मन्त्रालयले अनुरोध गरेको छ।