जेसीके फाइट नाइटमा युकी आङ्देम्बेको जित

नेपाली मिश्रित मार्सल आर्ट्स (एमएमए) खेलाडी युकी 'द गोर्खा' आङ्देम्बेले चीनमा भएको जेसीके फाइट नाइट १२३ मा जित हात पार्नुभएको छ। चीनको शान्सी प्रान्तस्थित लुलियाङमा आज आयोजित प्रतियोगिताको मुख्य कार्डअन्तर्गत उहाँले घरेलु फाइटर बुहुओगुबुलाई सर्वसम्मत निर्णयबाट पराजित गर्नुभएको हो। यो भिडन्त १३५ पाउन्ड तौल समूह अर्थात् ब्यान्टमवेटमा भएको हो।

३ राउन्डसम्म चलेको खेलमा आङ्देम्बेले तीनै राउन्ड आफ्नो पक्षमा पार्दै निर्णायकहरूको पूर्ण मत हासिल गर्नुभयो। खेलको सुरुआतदेखि नै उहाँले घरेलु प्रतिस्पर्धीमाथि निरन्तर दबाब कायम राख्नुभएको थियो। यो जितसँगै उहाँको लगातार तेस्रो जित दर्ता भएको छ।

उहाँको पेसेवर एमएमए करियरमा जित सङ्ख्या ९ पुगेको छ भने हालसम्म ३ भिडन्तमा मात्र हार व्यहोर्नुभएको छ।