प्रचण्ड: स्वाधीनतामा सङ्कट, चाडपर्व मितव्ययी ढङ्गले मनाऔँ

नेपाली कम्युनिस्ट पार्टीका संयोजक पुष्पकमल दाहाल प्रचण्डले देशमा राष्ट्रिय स्वाधीनतामाथि सङ्कट देखिएको बताउनुभएको छ। आइतबार जारी भिडिओ सन्देशमा उहाँले यसपटकका चाडपर्व मितव्ययी ढङ्गले मनाउन आग्रह गर्नुभएको छ। भोटेकोशीको बाढीले ठूलो क्षति पुर्‍याएको अवस्थामा चाडपर्व सादगीपूर्वक मनाउनु उचित हुने उहाँको भनाइ छ।

विभिन्न कारणले जनताले फेरि महँगीको मार खेप्नुपरेको पनि प्रचण्डले उल्लेख गर्नुभएको छ। दसैँलाई असत्यमाथि सत्यको विजयको प्रतीक मानिने भन्दै उहाँले यो पर्वसँग नेपालीले नयाँ आशा र अपेक्षा जोड्ने गरेको बताउनुभएको छ। सत्य र असत्यको यो प्रसङ्गलाई उहाँले समाजमा देखिएका विसङ्गति, विकृति, अराजकता र निरङ्कुश प्रवृत्तिविरुद्ध लोकतन्त्र र गणतन्त्रसँग जोड्नुभएको छ।

यसैबीच प्रचण्डले गोरखाको बूढीगण्डकी नदीमा आएको बाढीका प्रभावितको उद्धार, राहत र सुरक्षामा सहभागी हुन सबैलाई आग्रह गर्नुभएको छ। सामाजिक सञ्जालमार्फत उहाँले बूढीगण्डकीदेखि त्रिशूली किनारसम्म बस्ने नागरिकलाई अत्यन्त सावधानी अपनाउन अनुरोध गर्नुभएको छ। लेदोसहित आएको उक्त बाढीले चुमनुब्री, धार्चे र आरुघाटलगायतका क्षेत्रमा पक्की पुल, झोलुङ्गे पुल, घर र बजार क्षेत्रमा क्षति पुर्‍याएको छ।

कतिपय स्थानमा पुल र घर बगेका छन्। विपद्को घडीमा प्रभावित नागरिकको सहयोगमा एकजुट हुन उहाँले आह्वान गर्नुभएको छ।