विपद् व्यवस्थापनमा सरकारको आलोचना: ओली र शाही

नेकपा एमालेका अध्यक्ष केपी ओली र राप्रपा संसदीय दलका नेता ज्ञानेन्द्र शाहीले विपद् व्यवस्थापनमा सरकारको भूमिकाप्रति प्रश्न उठाउनुभएको छ। पार्टीको मिसन पार्टी जागरण अभियान तथा अगुवा कार्यकर्ता भेलामा बोल्दै अध्यक्ष ओलीले सरकार जनताप्रति जवाफदेही हुनुको सट्टा स्टन्टबाजीमा केन्द्रित भएको आरोप लगाउनुभएको छ। भोटेकोशी र त्रिशुलीमा बाढी आउँदा सरकारी हेलिकप्टरको दुरुपयोग भएको र राहत तथा उद्धार समयमै नभएको उहाँको भनाइ छ।

केही मन्त्रीले सरकारी हेलिकप्टरलाई कुनै संस्थाको निजी सम्पत्तिझैँ प्रयोग गरेको पनि उहाँले आरोप लगाउनुभएको छ। यसपटक त्यस्तो कमजोरी दोहोरिन नहुने उहाँले बताउनुभएको छ। वैदेशिक सहयोग समयमै स्वीकार नगरिएको र त्यसको उचित उपयोग हुन नसकेको ओलीले बताउनुभएको छ।

सरकारले सर्वदलीय समिति बनाउनेसम्मको उदारता नदेखाएको उहाँको टिप्पणी छ। यता राप्रपाका शाहीले बुढीगण्डकी र भोटेकोशीको बाढीपहिरोबाट समयमै पाठ नलिए ठूलो नोक्सानी हुन सक्ने चेतावनी दिनुभएको छ। सामाजिक सञ्जालमार्फत उहाँले खोला किनारका जोखिमयुक्त बस्तीलाई सुरक्षित ठाउँमा सार्ने काम तुरुन्त थाल्न आग्रह गर्नुभएको छ।

देश हिमनदी र हिमताल विस्फोटको उच्च जोखिममा रहेको शाहीको भनाइ छ। विपद् आएपछिको उद्धारभन्दा पहिल्यै तयारी गर्नुपर्नेमा उहाँले जोड दिनुभएको छ। सम्भावित क्षति घटाउन सबैलाई सजग रहन पनि उहाँले आग्रह गर्नुभएको छ।