पोखरा विमानस्थलमा फ्लाई दुबईको नियमित उडान सुरु, होटलमा छुट योजना

पोखरा अन्तर्राष्ट्रिय विमानस्थलबाट फ्लाई दुबईले बुधबारदेखि दुबई–पोखरा–दुबई रुटमा नियमित उडान सुरु गर्दैछ। विमानस्थलका महाप्रबन्धक जगन्नाथ निरौलाका अनुसार अन्तर्राष्ट्रिय उडानका लागि आवश्यक तयारी र पूर्वाधार व्यवस्थापनको काम पूरा भइसकेको छ। फ्लाई दुबईको जहाज बुधबार साँझ ६ बजेर १५ मिनेटमा पोखरा अवतरण गर्नेछ भने ७ बजेर १५ मिनेटमा यात्रु लिएर दुबईका लागि उड्नेछ।

यो उडान दैनिक सञ्चालन हुने तालिका रहेको विमानस्थलका सूचना अधिकारी विनोदसिंह रावतले जनाउनुभएको छ। विसं २०७९ पुस १७ गतेदेखि सञ्चालनमा आएको विमानस्थलमा नियमित अन्तर्राष्ट्रिय उडान हुन नसकिरहेका बेला यहाँका पर्यटन व्यवसायी, उद्योगी र सर्वसाधारण उत्साहित छन्। होटल सङ्घ पोखराका अध्यक्ष लक्ष्मण सुवेदीका अनुसार फ्लाई दुबईबाट आउने यात्रुलाई पहिलो ३ महिना होटलमा करिब २५ प्रतिशत छुट दिइनेछ।

छुट योजनामा अहिलेसम्म करिब ५० होटल आबद्ध भएका छन् र यो सङ्ख्या थपिने उहाँको भनाइ छ। पहिलो उडानबाट पोखरा आउने यात्रुलाई १ रातको बास र भोलिपल्ट बिहानको खाजा निःशुल्क दिइनेछ। रेष्टुराँ एण्ड बार एसोसिएसन पोखराले बोर्डिङ पास भएका यात्रुलाई आबद्ध रेष्टुराँमा करिब १५ देखि २० प्रतिशतसम्म छुट दिने जनाएको छ।

फ्लाई दुबई र इमिरेट्स एयरलाइन्सबीचको कोडसेयर साझेदारीका कारण पोखराबाट दुबई हुँदै अष्ट्रेलिया, युरोप र अमेरिकासम्म एउटै टिकटमा यात्रा गर्न सकिने जनाइएको छ।