कांग्रेस देउवा पक्षले १५औँ महाधिवेशन मंसिर २१ देखि २३ गतेसम्म गर्ने

नेपाली कांग्रेसको संस्थापन इतर पक्ष (शेरबहादुर देउवा पक्ष) ले पार्टीको १५औँ महाधिवेशन मंसिर २१, २२ र २३ गते गर्ने भएको छ। शनिबार महाराजगञ्जको चुनदेवीस्थित पार्टी सम्पर्क कार्यालयमा आयोजित पत्रकार सम्मेलनमा यसबारे जानकारी दिइएको हो।

समूहका नेता डा. महतले सहमति नजुटेपछि महाधिवेशनको तयारी आपत्कालीन अवस्था (इमर्जेन्सी मोड) मा गरिरहेको बताए। समूहले सहमतिका लागि गरिएको प्रयास सम्भव नभएको जनाएको छ।

महाधिवेशन तयारी समितिका संयोजक डा. शशांक कोइरालाले आसन्न महाधिवेशन नेतृत्व चयनको औपचारिकता मात्र नभई कांग्रेसको भविष्यको दिशा तय गर्ने परीक्षा भएको बताए। 'नेपाली कांग्रेस बलियो विचार भएको पुरानो पार्टी हो। पुरानो भन्दाखेरि फाटेको होइन, नयाँ जोशका साथ हामी जाँदैछौँ,' उनले भने।

यसैबीच, उक्त समूहले १५औँ महाधिवेशनका लागि गठन गरेको सदस्यता व्यवस्थापन केन्द्रीय समितिले क्रियाशील सदस्यताको विवरण केन्द्रीय निर्वाचन समितिलाई बुझाएको छ। समूहको वडा अधिवेशनको तयारीले पनि गति लिएको छ।